عـشاق السـيارات المعــدله
هنتكلم النهاردة على الناس اللى بتسوق الاوتماتيك
لازم تعرف شوية حاجات فية
أول حاجة هنتكلم على الرموز الاساسية اللى بنشوفها فى الفتيس
الـ P يعنى Park دة اللى بتوقف بية العربية
الـ R يعنى Reverse دى اللى بيخلى العربية ترجع لورا
مارشدير يعنى
الـ N يعنى Natural وضع التمووير ... الموور يعنى
الـ D يعنى Drive وضع السواقة او المشى بالعربية
1 - لازم تبقى عارف أن العربية فى الاوتو مش هتدور
على الـ D ولا هتدور على الـ R لانة بـ اختصار ال D و ال R بيفصلو كهربة عن المارش تماما و مش هيخلى
العربية تدور نهائى
2 - و أنت واقف فى أشارة هات الـ N اللى هو المور عشان تريح تروس الفتيس و متلفش على الفاضى و تبقى
العربية عايزة تطلع
و انت ماسكها فرامل
3 - و أنت بتجيب الـ D أو الـ R خلى رجلك على الفرامل لانك لو جبت حاجة منغير فرامل هتلاقى العربية
مشيت
منغير ما تدوس بنزين لان التروس اتحركت و حركت العربية معاها ...
4 - مينفعش تنقل من نقلة لـ نقلة و العربية ماشية حتى لو ماشية على سرعة 5 كم يعنى مينفعش مثلا و انت
بتطلع من ركنة و جايب ال D و العربية لسة براحة اوى اهى و بتطلع من الركنة تروح جايب ال R عشان
تعدل نفسك و تطلع
لا انت كدة بدمر تروس الفتيس مع الوقت لازم العربية تقف
و تروح جاى ناقل من الـ D و الـ R و العكس
5 - نيجى بقى للـ الاوضاع التانية و هى الـ L و الـ 2 و الـ 3
الـ L هو الغيار الاولانى و دة الناس بتستخدمة فى المطالع الجامدة لانة بيدى عزم شديد على سرعة قليلة بس خد
بالك مينفعش تكون ماشى 60 ولا 80 و تروح جايب الـ L هتكسر الفتيس كدة اخرك 30 بالكتير تجيب الـ L
عليها
الـ 2 و دة الغيار التانى و الاول مع بعض بيسمح للعربية تننقل بينهم
الـ 3 و دة الغيار الاول و التانى و التالت فقط مش بتنقل للرابع
ممكن عادى و انت ماشى على الـ L او ال 2 او ال 3 تجيب ال D مرة واحدة عادى لانة دة شغال على جميع
النقلات ف اى وقت عادى
6 - #نصيحة ياريت الكل يعمل بيها لو عايز تحافظ على فتيس عربيتك
و انت بتركن او بتقف بالعربية
متروحش جايب ال P مرة واحدة و متشدش الهاند
او تجيب ال P و تشد الهاند بعدها
الوقفة الصح بالفتيس الاوتو هو انك خلاص هتبطل اهو و تنزل من العربية ركز بقى معايا
تروح دايس فرامل و تجيب الـ N و ترفع الهاند و بعد كدة
تجيب ال P
3خطوات ... من الشمال لليمين
N > Handa Break > P
انت بكدة حملت على الهاند بريك و اللى وظيفتها توقف العربية
لاكن لما بتجيب ال P و بعد كدة الهاند انت كدة حملت العربية كلها بالمكنة بكلة على ترس الفتيس و مع الوقتبيتاكل و يتكسر و ترجع تقول لية انا كنت محافظ على العربية
يارب تكون المعلومة وصلت بطريقة سهله وبسيطه ...
#شير وفيدغيرك عـشاق السـيارات المعــدله تتمنى لكم قياده أمنه
الاضواء التحذيرية في التابلوه
في تابلوه او عداد العربية لمبات تحذيرية كتير بتنور اول لما نيجي نفتح الكونتاكت قبل نا ندور العربية..
في ناس كتير مننا متعرفش ايه وظيفة كل لمبة من اللمبات دي..
اكيد في كتير منها معروف.. بس برضه في حاجات تانية بتبقي غامضة شوية و مش افهمينها..
و المشكلة ان ده ممكن يكون سبب ان العربية يحصل فيها مشكلة..بسبب ان التحذير اللي اللمبة بتاعته كانت منورة احنا مش فاهيمن ايه وظيفته..و ده انا شوفته فعلا في موضوع كان فاتحه احد الاخوة هنا عن عربية بنته.. و كان عنوانه علي ما اذكر.. عدم المعرفة بتكلف فلوس او حاجة زي كده.. و ده كان الدافع اني اعمل الموضوع ده
نبدأ بقي.. باصورة و الشرج..
اول لمبة تحذير و من اسهل و اوضح اللمبات ودي موجودة في كل العربيات تقريبا مش حاجة جديدة يعني..
وظيفتها بتنور لو بطارية العربية او الدينامو او دايرة الشحن فيها اي مشكلة..
محاطر اللمبة دي:: بتبوظ البطارية او تقلل كتير من عمرها الافتراضي
ممكن يكون معناها ان البطارية ضعيفة او ان البطارية مش بتشحن نتيجة وجود خلل او عيب في الدينامو او دايرة الشحن..
اللمبة دي كمان موجودة تقريبا في كل العربيات القديمة كمان..عادي..
بتنور اللمبة دي لو زيت العربية المعدل بتاعه اقل من اللازم..لدرجة تمثل خطورة علي الموتور..
وده بيكون بسبب ان في تسريب زيت بسبب طبة كارتيرة او اي عيب تاني.. او ان العربية تكون بتاكل زيت نتيجة ان الموتور خفيف و داخل علي عمرة..
و كمان (معلومة غير مؤكده..) ممكن تكون دليل علي ان طلمبة الزيت مش بتعمل بكفاءة..
مخاطر اللمبة دي:: ممكن يكون في خطورة علي موتور العربية انه يقفش لا قدر الله.. و في الحالة دي علي طول فيها عمرة..او تغيير بساتم..
اللمبة دي مش موجودة في العربيات القديمة.. دي موجودة في العربيات الحديثة نسبيا يعني التمانينات و التسعينات..
وفي سنة 1981 بقت حاجة اساسية في اي عربية تنزل السوق في امريكا.. و بدأت تنتشر من ساعتها..
اللمبة دي بقي بتنور امتي..
العربيات اللي فيها اللمبة دي بيبقي فيها كونتول يونيت.. ECU ووظيفة الوحدة دي التحكم و متابعه كل اجزاء العربية الاليكترونية..
حساسات بقي و الحاجات دي.. و دي بصراحة انا مش فاهم فيها قوي..و مش هاعرف اقول عنها كتير..
و الحساسات بقي كتير.. زي حساس الهوا و حساس السرعة و حساس الشكمان.. و حساسات كتير و ما اكترها في موديلات العربيات الجديدة و المواتير المعقدة..
عادة اللمبة دي بتنورمعني كده ان في احد الحساسات فيه مشلكة..
كحاطر اللمبة دي:: ان العربية لو فيها مشكلة و انا مشيت بيها و هي كده..(ده لو المشكلة مسببتش ان العربية تقف كلية و متدورش اصلا..)
ان العربية ممكن يحصل فيها مشاكل كبيرة..
عادة لما الكومبيوتر بتاع العربية بيحس ان في سنسور مش شغال او مش بيبعت الاشارة المتوقعه منه.. بيبعت اشارة للمبة دي انها تشتغل.. و بيسجل عنده الكرد بتاع المشكلة دي..
و ببساطة.. كل كود بيسجل بيبقي في كتالوج العربية دليل علي مشكلة معينة.. و ده بصراحة اختراع في منتهي الفايدة..
نعمل ايه لما اللمبة دي نشوفها منورة في التابلوه عندنا..؟؟
نتوجه بسرعة و من غير ما نمشي بالعربية كتير لأقرب مركز خدمه عنده الجهاز اللي بيوصل علي كومبيوتر العربية,, (في ناس بتسميه سكانر)
و تقرا كود المشكلة.. و تعرف سببها و تصلحها في اقرب وقت..
اللمبة دي بقي بيتهيألي سهلة جدا..
دي لمبة البنزين.. و مش بتنول غير لما مستوي البنزين في التانك بيوصل لدرجة معينه.. عادية يعني بيبقي نسبة تكفي ان الواحد يمشي بالعربية مسافة معينة.. رقم مش ثابت رأي عربية..
(بيتهيألي في ناس كتير الايام دي و بعد اسعار البنزين الجديدة هتشوف اللمبة دي منورة في التابلوه عادي جدا.. :( )
محاطر اللمبة دي لما تنور::
بيتهيألي مشاكل مش كبيرة بس ممكن انها تبقي بايخة و تخلي العربية تلخبط شوية..
اولها ان التانك عادة بيبقي فيه شوائب ووساخة في اخره تحت في اخر شوية بنزين.. و ده علي فكرة في كل البنزين.. يعني مش ال80 و ال90 بس.. لأ كله وده شيء عادي..و لما البنزين بيوصل للمستوي ده طلمبة البنزين بتسحب من البنزين اللي فيه شوائب.. و ده بيتعب الطلمبة نفسها.. و ممكن يقلل عمرها.. و بيلخبط و بيسد بيكات الكاربيراتير.. و ممكن يسد الرشاشات.. (للكاربيراتير و الانجكشن)
و في نقطة تانية.. ان طلمبة البنزين لما بتسحب بنزين من التنك من تحت بيبقي الحمل عليها عالي.. و ده بيجهدها و بيقلل من عمرها الافتراضي..
اللمبة دي مش بتعبر عن مشكلة.. (الحمد لله..)
ده مجرد تنبيه انك منور النور العالي.. و يفضل ان الواحد مينوروش غير في طرق السفر لما يكون محتاج ينور علي مسافات كبيرة..
(تنبيه واجب.. بس عشان بعض الاخوات اللي بيسوقوا اوقات كتير بينسوه شغال و هن ماشيين, جوة البلد.. و بيعموا كل الناس اللي ماشيين معاهم في نفس الاتجاه في المرايات.. و اللي ماشيين عكسهم في وشهم.. :) وانا برضه باقول بعض.. مش كل.. عشان محدش يزعل مني..)
اللمبة دي برضه ليل علي ان الواحد منور النور الواطي.. اللي هو يفضل انه يبقي منور علي طول في السواقة في وسط البلد..
وده الوسط بين نور التابلوه اللي هو بيبقي مجرد اضاءة لأصغر لمبة في مقدمة العربية و بين النور العالي..
وده امان.. و مش بيضايق حد (الا لو الكشافات ارتفاعاتها مش مظبوطة و ضاربة في العالي في وش الناس..)
اللمبة دي بقي.. فايدتها تنبيه ان الواحد مشغل نور الشبورة Fog lights
و معلومة هامة.. ان اضواء الشبورة دي مش شرط تكون الامامية بس اللي بتركب في الاكصدام من تحت.. لأ في عربيات كتير جدا بيبقي فيها نور شبورة خلفي.. و هو بيبقي عبارة عن لمبات حمرا تانية غير بتاعت النور الواطي و الفرامل.. بيبقي مكانها مختلف ..
كل فايده النور ده انك تشوف قدامك كويس في الشبورة.. و اللي جاي في وشك يشوفك.. و كمان اللي ماشي وراك يشوفك..
اللمبة دي بقي يا جماعه بتاعت نظام اسمه Skidding Road او الطرق الزلقة.. المزحلقة يعني..
و بنشغل النظام ده لما تكون بتطلع في ارض فيها مية او زيت او تلج او رمل ناعم قوي.. و ده بيقلل عزم العربية في الطلوع عشان العجل ميلفش في الفاضي و كمان العربية متنحرفش و تلف منك و تغير اتجاهاتها..
المعلومة دي انا عرفتها من الاخ هشام ابو النجا من منتدي اوبل هنا.. و برضه ده عكس نظام القيادة الرياضية..
يعني لو شغلت ده يلغي التاني و العكس صحيح..
االلمبة دي بقي بتنور في حالة واحده بس.. ان العربية وصلت لمرحلة الاوفر هيت.. يعني الحرارة وصلت لمرحلة الخطر..
و في الحال دي الواحد لازم يقف تماما و يبطل العربية و تكشف علي المية و الزيت.. و مبتحركش الا لو العربية بردت و نزلت عن المستوي ده..
اسباب ان اللمبة تنزر: ممكن يكون مستوي المياة في الردياتير قليل.. او في تسريب فيه..
او يكون مستوي الزيت في الموتور قليل.. لو العربية بتاكل زيت او بيسرب.. او يكون الزيت نفسه بقي وحش و فقد خواص التبريد و التزييت بتاعته و محتاج يتغير..
المحاطر:: لا قدر الله ممكن الموتور يقفش او اجزاء منه جوة تتكسر نتيجة التمدد الجامد من الحرارة..
ودي لا قدر الله فيها عمرة من غير جدال.. او علي احسن الفروض ان جوان وش السلندر يضرب و دي اهون حاجة..
و بيكشط وش السلندر يتساوي و يتغير الجوان..
دي واضحة قوي و هي لمبة الاشارات..
في عربيات بيكون فيها كل اشارة اتجاه في لمبة لوحدها و عربيات اتنية بيكون لمبة واحدة لإتجاهين مع بعض..
اللمبة دي بتنور لما تكون فرامل اليد مرفوعه..تنبيه يعني ان الواحد ميتحركش و هي كده
مخاطرها:: مش متأكد منها قوي بس بيتهيألي ممكن تقطع واير فرامل اليد او تسبب تأكل في التيل الخلفي..
اللمبة دي بقي برضه سهلة وواضحة وهي لمبة الانتظار..
اللمبة دي بقي بتاعت الوسادة الهوائية او الاير باج .. و دي بتنور لما الكومبيوتر يكون شايف ان في مشكلة في الاير باج..بمعني احر ان لا قدر الله لو حصل موقف المفروض ان الايرباج تفتح فيه ممكن انها متفتحش.. يعني روح اكشف عليها..
اي لمبة من ال2 دول معتنبيه لنظام الفرامل المانعه للأنغلاق.. ABS
وده بينور لما النظام ده نفسه بيشتغل..وفي اوقات لو نور لوحده كده و العربية واقفه.. يبقي النظام فيه مشكلة.. و محتاج صيانة..
و قريت تعليقات بعض الاعضاء قال انه اوقات كان بينور معاه علي سرعات عالية يعني 140 مثلا.. وده حصل اما كنا التيل عايز يتغير..
والنظام ده بيشتغل اوتوماتيكيا لما العربية بتتحرك بسرعة في حدود 20كم و بيطفي اقل من السرعة دي..
اللمبة دي بتنور تحذير لما يكون اللي سايق العربية مش رابط حزام الامان..و في عربيات تانية بيبقي فيها لمبة تانية للي قاعد جنب اللي سايق..
بتنور و تعمل فلاش كده طول ما الحزام مفكوك..و مش بتنور غير لما العربية تتحرك بسرعة معينة.. تقريبا 20 كم ولا حاجة..
و ده انا شايفه من اهم التحذيرات اللي موجوده.. بس للأسف ناس كتير مش بتهتم بيه يا اما عشان الصوت يبطل بتربط الحزام علي الكرسي مش علي اللي سايق..
اللمبة دي تنبيه ان السخان اللي علي الزجاج الخلفي شغال.. ووظيفة السحان ده انه بيبخر الشبورة من علي الزجاج الخلفي للعربية..
وبنلاحظ الحجاية دي قوي في الشتا لو سايق و العربية مقفولة و في نفس سحن جواها.. ترقي القزاز كله شبر كده و غيم..
لما تشغله بيروح الكلام ده كله..
اللمبة دي برضه واضحة جدا.. بتنور تنبيه لما يكون في باب من الابواب و غالبا اللي قدام بس مش مقفول كويس..
وده بقي الرمز بتاع مثبت السرعة.. بيبقي تنبيه انك مشغل نظام مثبت السرعة او cruise control
.. احب اوضح ان معظم اللمبات التحذيرية اللي في التابلوه زي الاير باج و الفرامل مانعه الانزلاق و البطارية و الزيت و التشك انجين و و و و بتنور اول لما الواحد بيفتح الكمونتاكت قبل ما يدور العربية.. و بتفضل منورة كام ثانية كده و بتطفي لو العربية تمام و مفيش مشاكل..
لو في لمبة منهم فضلت منورة يبقي كده بقي في مشكلة.. شوف سببها ايه..
انا لما دورت علي النت علي صور لعدادات فيها اللمبات دي منورة بصراحة ملقتش صور كتير و اوضح صورة لقيتها فيها الموضوع ده كانت لعربية ليها عشان كتير جدا في المنتدي هنا و بتنال اعجاب الكتير و انا نفسي منهم..
هاوريكم الصورة و قولولي بقي عرفتوها ولا لأ.. :)
ليست هناك تعليقات:
إرسال تعليق