بحث هذه المدونة الإلكترونية

Powered By Blogger

الاثنين، 25 يناير 2010


لو قولتوا لى اكتبى قصيدة


مش ح اكتب  غير عن مصر


و


يا سلام لو حد هرب م الدوشة


وراح وجابلى ورد..


دة انا



أموت م الفرحة والدهشة


و


لو كتبت قصيدة


وقولتلى حلوة


قوليها تانى


أتنطط زى العيال الصغيرين


و


أقولك  طب احلف


والله العظيم


بتتكلم جد..


يمكن عشان أيام الفرح قليلة


سهل تتعد..


عارفة


رغم إن المخازن


كل يوم بتتحرق


ومفيش حساب ولا جرد..


و


رغم وجود السيرك


والأراجوز


والتلات ورقات


و


جوز وفرد..


عمرى ما اتمنيت أكون أميرة


أو ولية عهد..


لكنى بحلم بوطن


مفيهوش ولا حارة سد..


وطن بيفرح بجد


عارفة ان بلدى


رغم إنها


بتقع..


بتغرق..


بتتنيل بستين نيلة


لكن جميلة


و


عمرها ما هاتتهد



وح تيجى فى يوم ح تقف


ومش ح تشمت فينا حد


دية مصر احنا عارفينها


من صغرنا وبنحبها بجد