على فكرة
ح اعيش معاكم
لحظات من غير هوية
هكون مواطنة اسمها س
زى الاخبار ما بتيجى
معرفش ازاى ومنين
قناة الفلانية اذاعت
رأى خبيرها ص
واخر اسمة ج بيعلق بيقول
غلابة المصريين
مصر ضاعت مصر راحت
مساكين المصريين ؟!
اهلاً يا ملاك الرحمة !
وقناعك دة جايبه منين ؟
من غرفة فى آخر الدنيا
هتدمرنى بسطرين ؟!
ولا تحسب تعليقك
ح يدمر جهاد السنين
علشان انت باحث عن الشهرة
جاى تشتم
وتفرقعلك بقين
انت جاى تبيع ميه
فى حارة السقايين ؟
احنا شعب واعى نقدر نقوم امتى وفين
لكن يمكن احنا نايميين دلوقتى
بفعل الزمن والسنين
بنبحث عن لقمة العيش
او يمكن دلوقتى مكسورين
لكن انا باقولك
ان مصر ما عجزتش
لملم تعابينك وامشى
محناش متفرقين
اقلية واغلبية !؟
حكومة ومعارضين ؟
كلنا فى الآخر واحد
على فكرة انت تبع مين ؟
على كلٍ ما انتش منا
عن نصحك مستغنين
ماهو شوقى قالها زمان
والثعلب والديك شاهدين
مخطئ من ظن يوما
للثعلب المكار دين
على فكره
انت
ما عندكش فكره
مين هم المصريين
على فكره ما عندكش فكره
على فكره ما عندك فكره
دة احنا يوم ما نحس بالخطر
جاى على العرب والمصريين
شوف احنا ح نعمل اية
وما تدخلوناش بعد كدة فى حوارات وس وج
ومش عايزة اسمع حكاوى القهاوى عن المصريين
وانا حاسة ان بعد كلامى هذا ح ادخل فى س و ج
ربنا يحنن قلب السلطة علينا قولوا امين
ليست هناك تعليقات:
إرسال تعليق