أليس في بلاد العجائب

أليس في بلاد العجائب

 
رجعت اليس بعد 20 سنة من الغربة قضت فيها ايام حلوة وايام صعبة كتير
وصلت وبايدها شنطة وعلى ظهرها شنطة كل دة مش مهم لانها
جاية تشوف بلادها اللى حكوا لها عنها اما كانت مفعوصة زى باربى اللى بيلعبوا بيها الصغار
خرحت اليس من المطار وبدات القصص اللى ما تخطر على بال
لقت الشوارع مسدودة بالاحجار ودة عمل من فعل الخرفان
وشافت التراث اللى متمثل فى عربية يحمار وبغال ماشية فى طريق المطار
وبلحظة انقطع الارسال مع ان التليفون كان من شوية شغال وعال العال
يس هية دى الحال وربنا يعيننا فى كل الاحوال
ووقفت السيارة مجموعة من رجال الداورية بوجوههم البشوشة وطلتهم البهية
وسبب الوقفة كان شوية تحريات امنية
وممكن الوقفة تخلص ب50 او 100
بس الشوفير البطل حلها وخلص اليس من القضية
وازاى ما يقدرش يحلها وكل يوم بتوقفة ييجى 20 داورية
تانى يوم نزلت اليس للسوق لوحدها وبدون دليل
كانت حابة تتنشق الهواء العليل لقيت هواء من شكمان التكاتيك
اخدت تدور على خريطة سياحية
دخلت على حوانيت قليل و كتير
بس فشلت كل محاولاتها وضحكوا عليها اصحاب الدكاكين
فاستنجدت بعابرى السبيل
وعابرى السبيل فية منهم الادمى وفية منهم الثقيل
وفية منهم الحشرى وفية ابو لسان طويل
وكلهم بيشرحوا بالاشارة ما فيش واحد منهم عندة لغات ولاينفع يكون دليل والمشكلة ما فيش بديل
مشيت اليس فى الشوارع ولقت وجوة محملة ب100 لون ولون
اللى ملتاع واللى حيران وبيفكر منين يقدر يدفع فاتورة الكهرباء ولا التليفون
واللى عمال يقول فى قلبة هونها بتهون
شافت تجار على عربيات بيبيعوا كل حاجة عبايات وملابس وبسكوت والعاب اطفال
وبلحظة وهية عمالة تبص وصلت داورية مكافحة البياعين المشاغبين
وبدء الماراثون ماراثون كلة جديد وفريد ما فية منة اللا عندنا بس فى الاسواق اللى فيها فتارين
اليس كانت ح تقع اما اتزحلقت فى قشر البطيخ اللى اتكسر قدام الدكاكين
رجعت اليس على غرفتها لترتاح بعد يوم سياحى ملىء بالاحداث الملاح
كانت مغمومة ومش عارفة لية قلبها مليان بالاطراح
وشغلت التليفزيون يمكن تشعر بالارتياح
وبالصدفة الغريبة طلعت لها قناة كل اخبارها حروب ومذابح ونحار
ولكن ربك ستار فجاة النور انقطع فقالت طب ازاى انام لحد الصباح
وفى الصباح رجعت اليس ع المطار وسابت الناس والطير والهواء والاشجار والمياة والافكار
رجعت اليس ع المطار راسها ح يقتلها وعقلها محتار
بعد ما قضت كام يوم بمسقط الراس والدار
دخلت اليس ع المطار وطارت من جديد
طارت وهية مش قادرة تتكلم ولا تقول اللى شافتة لاى حد قريب او بعيد وعقلها محتار
انا حكيت قصة اليس المصرية وح اظل اقول واعيد
مش عايزة مسئول حكومى من كلامى دة يتضايق ويهددنى من جديد ويقول انة ح يضع فى ايدى الاصفاد
ويقول لى دية حكاية كل يوم ولازم تصير ونصبر لغاية ما يحلها الستار
ولا يقول لى انتى بتبالغى بقصص بتضر ومش بتفيد واسكتى احسن احطك فى الحديد
بلدنا حلوة يا عالم بلدنا حلوة يا ناس
بس خلونا نقعد مع بعض ونفكر ازاى نبنيها من جديد
غمض عينيك و ارقص

 بخفة و دلع..الدنيا هي الشابة و انت الجدع..تشوف رشاقة خطوتك تعبدك..لكن انت لو بصيت لرجليك تقع

حبه سياسة من بنت مصرية
هذه كتاباتى.
هذه قناعتي .. وهذه أفكاري
أكتب ما اشعر به وأقول ما أنا مؤمنة به
انقل هموم غيري بطرح مختلف وهي في النهاية .. مجرد رؤية لأفكاري
مع كامل ووافر الحب والتقدير لمن يمتلك وعياً كافياً
يجبر قلمي على أن يحترمه
ان الغاية النبيلة لا تحيا الا في القلب النبيل

#أسفة_يامسئولين
#كوكى_عادل
#بنت_النيل