بحث هذه المدونة الإلكترونية

Powered By Blogger

الاثنين، 23 ديسمبر 2013

حكاية واحد من الثوار واسمه محمد الخليجى ابن الفسطاط


حكاية واحد من الثوار  واسمه محمد الخليجى ابن الفسطاط



الحكاية النهاردة قديمة حبتين ...
حتة طولونى كدا معتبرة
وعاوزة أقولكم انى طول ما بدور وادعبس وراها
جاى على بالى الأيام دى قوى
وهيا متعتبرش حكاية من زمن الدولة الطولونية
قد ما تعتبر من توابعها
وجزء مبعدش قوى عنها
 وكنا حكينا زمان حكاية أحمد ابن طولون
وقولنا ازاى الحاج طولون الكبير
بدأ شجرة العيلة الطولونية بقوة وسيطرة
وخلى البلد جنة وورثها لأبنه خمارويه
وخمارويه قعد يبعتر ف ميراث بابا لحد ما انقتل
وخد الحكم من بعده ابنه ابو العساكر
 وبعدين انقتل برضك
ومسك اخوه هارون اللى كان سنه وقتها 14 سنة
والولد كان صغير وغلبان
الخليفة العباسى كانت مصر بعيدة عن شنبه لمدة طويلة
 وقرر الرجوع للسيطرة على مصر بقوة
فبعت جيشه لمصر 
وهارون حاول يقاوم بجد
بس عمامه انتهزوا الفرصة للوثوب على العرش
راحوا قاتلينه ف دمياط
وكان مستخبى هناك
 و العم الأكبر واسمه شيبان قعد ع الكرسى
ورجع على القصر الجمهورى عشان يحكم بقى
 لقى الأعيان والكبرا و كتايب الجيش قايمة عليه
ورافضة انه يمسك البلاد
 ودخل قائد الجيش العباسى العاصمة القطائع منتصرا
 وعقد صفقة
والناس افتكرت انها بتتعامل مع راجل وقد كلمته
 انما ف الحقيقة انه طلع نطع
 واللى بتكلم عنه يبقى
 محمد بن سليمان الكاتب قائد الجيش العباس
ليه ؟
عشان محمد بن سليمان الكاتب هيعقد اتفاقية
 انه يأمن الشعب المصرى
 لكن بشرط
يسيبوه يقضى على فلول الطولونين
والكبرات والمشايخ قالوا ايوه 
وياختشى ى ى
يا ختشى ع اللى حصل ز وصل
الكاتب قعد هوه وجيشه يقتلوا وينهبوا
ويحرقوا ف كل حتة ف القطائع
اللى كانت عاصمة مصر وقتها
 ومقر العرش الطولونى

والكاتب وكأنه مستنصد وجاى متسلط
حرق ودمر كل شىء ومسبش غير الجامع
 الحاجة الوحيدة اللى تقول ان ف يوم كان فيه حد
واسمه ابن طولون حكم البلد دى!
الجامع طبعا معروف
 ولما تقروا التدوينة هتعرفوا حكايته
وازاى اتبنى ومن ايه .. الخ الخ
المهم .. 
سليمان الكاتب بهدل الدنيا
وتغرى بردى بيقول بالنص :
هجموا على دور الناس فنهبوها
 وأخذوا أموالهم واستباحوا حريمهم وافتضوا الأبكار
ووصف ازاى المصريين 
هربوا من بيوتهم خوفا م القتل
وقال كمان بالحرف :
 .... وفعلوا فى المصريين ما لا يفعلونه فى الكفرة !!
وقعد وش الغراب سليمان الكاتب
 أربع شهور بلياليهم يقتل ويدبح وينهب ويعذب
 والناس بتضرب نفسها بالبرطوشة عشان وافقتله
 يمسك بدل حفيد بن طولون
وقعدوا يدعوا عليه ربنا ياخده
 لحد ما يظهر باب السما انفتح
والدعوة أجيبت والخليفة المكتفى بعتله
وقاله تعالالى بغداد يا سليمان 
وكفاية كدا!
طبعا سليمان اتغاظ
 وكان نفسه يقعد ف مصر
 ويحكمها
 فالسبوبة راحت قام لامم كل ما يقدر عليه من ثروات منهوبة
 وما ادراكم ما كانت ثروات بنى طولون!
خير متلتل طبعا وملوش آخر
 خده الكاتب ورجع على بغداد
وطبعا جواسيس المكتفى نبهوه
 ان قائدك سليمان مكمّر فلوس من وراك وخد بالك يا عم !!
على ما وصل سلامونتى ونفض تراب السفر
ووقف قصاد مولاه الخليفة يتحاسبوا
وطبعا معرفش يعمل زى الريحانى ف سى عمر
 ويضبط الدفاتر كويس !!
المكتفى باغته علطول وقاله اعلى بالحتة بخمسة
بدل ما نروح قدام المأمور ونطلعها
ومخدتش حاجة يا مولانا
دا الكاتب اللى بيقول 
و المهم من هنا لهنا الخليفة أمر بأعتقاله
واتصادرت فلوسه واتسجن
وطبعا مفيش داعى اكمل ... واقول أنقتل
معروفة
 وف داهية لا مأسوفا عليه
والمهم بقى نسيب بغداد 
ونرجع مصر
ونشوف حالها بعد ما مشى الموكوس دا
الكاتب قبل ما يمشى من مصر سلمها للوالى
اللى هيمسكها ويدير شئونها
والوالى كان اسمه عيسى النوشرى
وصدرتله اوامر بلم ما تبقى من جيش بن طولون
اغلب الجنود نقتلوا ف الدفاع عن القطائع
وف الحرب اللى قبلها قصاد جيش الخليفة العباسى
وفضل كام ألف كدا ف الآخر 
عيسى النوشرى قبض عليهم بالأمر
والاوامر قالت يروحوا على بغداد ..
عشان الخليفة مش عاوز أى فلول يفضلوا ف مصر
بعدين تزقزق ف دماغهم ويفكروا يعملوا أى ثورة مضادة  !
وتقولوش الخليفة المتكفى .. كان قلبه حاسس يا كبدى
 عشان دا اللى حصل فعلا
 بس محصلش ف مصر
 حصل ف الطريق للعراق وتحديدا ف دمشق الجميلة 
ازاى؟
وسط أسراب الأسرى والمخطوفات والاطفال
 والخير الكتير اللى اترحل ع العراق
كان فيه كمان شوية جنود ضمن الجموع
ومن وسطهم ظهر هذا الفتى
 بطل الحكاية
وهذا الفتى ..
المصادر اختلفت على اسمه
شوية قالوا ... محمد بن الخلنجى
 شوية قالوا .. محمد بن الخليجى
وشوية قالوا ابراهيم الخليجى ولخبطة كدا

انا شخصيا .. هتفق مع اللى سموه محمد بن الخليجى
 نسبة إلى خليج الفسطاط اللى هوه منه
واتربى فيها 
ومفيش وصف له ولا كلام كتير عن اصله للأسف
بس انا يحلو لى انى اتغزل فيه شوية
واتخيل شخصيته وشكله
 واتخيل ان ابوه جه مع الحاج احمد بن طولون
من العراق زماااان 
واستوطن الفسطاط
وبعدين الاب دا شاف بنت مصرية مجدع واتجوزها
 وخلف منها
والأبن دا بقى مصرى واتجوز من مصرية
 وخلفولنا ..
 محمد اللى كان طفل صغير 
بشوفه دلوقتى قصاد عينى
عيل حافى شقى
بيلعب ف حوارى مصر القديمة والفسطاط 
و اللى حبة و كبر
وبقى شاب طويل قمحى شعره اسود
 عيونه عسلى و فيها جرأة 
وبتشع ذكاء وطيبة مصرية صميمة
وزى اغلب الشباب ف سنه البكر 
شدته البدلة الميرى
 ودخل الجيش الطولونى وبقى من جند البلاد
 ولما العباسيين قرروا يستولوا على مصر
كان ف أول الصفوف لردعهم
وكله يمكن من خيالى الخاص بس فيه كام حقيقة
ذكرتهم الكتب
ان محمد الخليجى كان فعلا ف الجيش الطولونى
وانه فعلا حارب العباسيين
 وانه م الفسطاط
والخليجى وهوه ماشى وسط زمايله
 ومربوطين بالسلاسل يتجنن
ويبقى عاوز يرجع مصر
ويرفض مجرد فكرة انه يروح يخدم
 ف جيش الخليفة العباسى اللى غزا بلاده ونهبها
وعند دمشق تقف الرحلة ..
عشان الكل ياخد بريك من تعب السفر
 وينتهز الخليجى الفرصة
ويهرب بليل من معسكر الأسرى 
ويقرر يعمل اللى نوى عليه
محمد الخليجى هيقرر ينشق ع الخليفة العباسى
 ويسترجع مصر تانى ويردها للبيت الطولونى
 ويروح يستخبى ف حتة جنب القدس
ويبتدى ينشر دعوته لل تمرد
وايه يا بنى عاوز ايه ؟؟
عاوز مصر ترجع تانى تحت الحكم الطولونى
 والخليفة العباسى ملوش غير الضرايب والدعوة ع المنابر
ودمتم 
دى_كانت_شروطه
وابتدى يفكّر الناس ف كل حتة
بالمصايب اللى عملها الاخوان ..
قصدى العباسيين ف مصر
وازاى انتهكوا الحرمات وحرقوا وسرقوا وقتلوا 
فدعوته انتشرت

وابتدى الانصار يتلموا حواليه ويتسلحوا
ولما بقوا مجموعة كويسة كدا خدهم محمد الخليجى
 وطلعوا على مدينة اسمها الرملة
الرملة دى جنب القدس
ودخلها محمد الخليجى وهزم صوراتكين الوالى بتاعها
 وقتله هوه ورجالته
ودعا للخليفة العباسى ثم ابن طولون .. ثم لنفسه ولأهله
وهوه كدا عداه العيب
الراجل دخل المدينة اخدها لنفسه ولبنى طولون
 لكن لبس العمة للخليفة العباسى
عشان الشرعية والمهلبية والذى منه
بعد الرملة انصاره زادوا وانضمله عدد اكبر
راح واخد ف وشه وطالع على غزة
ف الوقت اللى الخليفة العباسى وصلته الاخبار
ووشه اسود ع الآخر !!
الخليفة العباسى بعت لعيسى النوشرى
اللى متولى شئون مصر
وقاله انتا يلى نايم على ودانك قوم
شوف الواد الخليجى دا حاربه واهزمه وخلصنى منه
عيسى راح مجهز الجيش
وخرج من القطائع العاصمة وطلع غزة
مطرح ما الخليجى متمركز
واتقاتل الجيشين وانهزم النوشرى وتقهقر للوراء
ورجع الشرقية
وف سياق متصل كنت عاوزة احط خريطة
 تبين موقع المعركة

المهم تقدم الخليجى واخد غزة
وطارد جيش النوشرى المتراجع لورا
وف سكته اخد العريش
 وكمان الفرما .. منطقة بورسعيد حاليا
والمنظر بقى نيلة قوى النوشرى عمال ينهزم
وياخد القفا ورا التانى
والخليجى عمال يكسب أرض ورا التانية
والخليفة ف بغداد شايط م الاخبار


النوشرى اتراجع للشرقية
وبعت للقطائع يطلب مدد زيادة
 واتقابل للمرة الرابعة مع جيش الخليجى
 ف حتة اسمها العباسة عند بلبيس
وبعدين متفهموش ايه اللى حصل
قبل ما الخليجى يهجم بقواته راح النوشرى واخد عساكره
وهرب على الجيزة
ومكنش حد عمله حاجة والنيعمة هوه اللى هرب لوحده!
وياريته وصل للجيزة ووقف
دا وصله ان جيش الخليجى جايلك الجيزة
 واوعى وشك
راح هربان على اسكندرية !!!
والقطائع بقت خالية من واليها وعسكرها
 والخليجى خد جيشه واتباعه
ودخلها منتصرا بعد أربع شهور من القتال 
والمجدعة على حق
وتغرى بردى بيقول ان مصر وقتها :
 صارت مصر مأكلة للغوغاء يهجمون على البيوت
ويأخذون الأموال من غير أن يردهم أحد عن ذلك
زى_دلوقتى
يعنى بالبلدى مصر 
كانت زى دلوقتى متبهدلة
 وملهاش صاحب
 ومفيش أمن
 و الناس بتتثبت ع الدائرى بتاع القطائع
 والشمع بيقطع 
والمية مبتوصلش ف القلل بعد الشمع ما ينطفى

الخليجى لما دخل .. علطول لم الليلة
 هوه اصلا كان عنده خلفية عسكرية وواخد ع النظام
وبسرعة بسرعة عيّن الوزير
 والقاضى 
وقائد الشرطة 
وقائد الجند
ولأن الناس حست ان الخليجى دا جاى وعاوز مصلحة البلد
 سريعا سريعا اتلم الشعب حواليه
يا سيسى يا مطلع احاسيسى

 و سريعا سريعا الأنفلات الأمنى تقلص .. وتقريبا تلاشى !!
تلاشى للدرجة اللى خلت الخليجى يقرر ياخد جنده
ويروح اسكندرية عشان يجيب عيسى النوشرى من قفاه
حيث كان يتحصن و متخفيا 
وهربان تحت السرير
  الخليجى لما دخل القطائع 
و اعاد اليها الامن
اتطوع للجيش الاف من ابناء الشعب ..
لحد ما بقى جيش الخليجى مكون من 50 ألف جندى
 غير الأعداد الزيادة اللى قرر يسيبها وراه ف القطائع
ويطلع بالعدد دا على اسكندرية الماريا
احنا كل دا وبنقول الحاصل ف مصر
 نروح لمراسلنا ف العراق بقى من قصاد قصر الخليفة
 ونسأله عن عواميد الدخان السودة 
اللى باينة ف الخلفية دى
فيقولنا أبد
ا مفيش
 دا الخليفة المكتفى بعيد عنكو مولع 
وجلبه جايد نار
وكل ما يطفوه .. يسمع الأخبار .. فيولع تانى
 ويطفوه ويولع ويطفوه وهكذا
المكتفى سمع بأن الخليجى دخل العاصمة واستقر
 قالك كدا ميبنفعشى
 وأصلى انا مسبتش رجالة ف مصر يا امينة
وراح باعت قائد من عنده ف بغداد
والقائد دا كان اسمه "ابو الأغر"
والمنظر كالآتى عشان التوهان
 أبو الاغر جاى على راس جيش من العراق
بينما النوشرى قاعد ف اسكندرية
 قوم ايه ؟
الواد محمد الخليجى اللى مجبتوش الا ولادة مصرية اصيلة
يطلع على اسكندرية ويحاصر النوشرى هناك
ويهزمه كالعادة 
والنوشرى يطفش ع الصعيد
ويدخل الخليجى اسكندرية .. منتصرا
ومحمولا على الأعناق
وتوصله الاخبار ان جيش أبن الأغر جايله ف السكة
 فتفتكروا هيسكت ؟؟؟ 
لأ_طبعا_دحنا_عندنا_رجالة


الخليجى هيقرر يفتح جبهتين للقتال
 واحدة ف الصعيد عشان يجيب النوشرى من حواجبه
وواحدة ف الشمال عشان يقابل جيش أبو الأغر
وبصو ف الخريطة
دا مجرد مخطط بسيط لخط سير الخليجى
 من القدس لحد الصعيد بالفوشيا
وخط سير النوشرى بالأزرق
وبص ع الحلاوة حلاوة 
قول_يا_متقال
شايفين محمد الخليجى ابدأ من برا حدود مصر ازاى
 ووصل لفين ..
 بينما النوشرى تراجع لورا لحد فين .. ؟
 الرسمة دى بتبين ازاى الجدع دا
 كان واخدها بجد
المهم انه أبو الأغر وصل مصر
وقابله الخليجى برجالته
 وطبق الاصل كل العلقات السابقات
وابو الأغر هزم شر هزيمة 
وتولى رجوعا من مطرح ما جه
والخليجى خلص خلاص من جيش الخليفة
وابتدى يروح ع الصعيد عشان يجيب النوشرى
ف الوقت اللى الخليفة العباسى كان قرب
 يلبس حلة على دماغه يا عينى
والمتكفى قرر ميسكتش ويبعت جيشين تانين
واحد تحت امرة ابن فاتك
والتانى بقيادة دميانة
وجيش بن فاتك اللى وصل الاول على مصر
 وعسكر ف النويرة


والنويرة دى هتلاقوها ف الخريطة
تحت خاالص ع الشمال جنب اهناسيا
اللى تبع محافظة بنى سويف حاليا
واحنا دلوقتى سنة 293 بعد ست شهور
من دخول الخليجى اسكندرية
وبعد 9 شهور من دخوله القطائع سنة 292
ومكملناش سنة 
وجيش بن فاتك معسكر ف بنى سويف
والخليجى بيستعد عشان يقابل جيش بن فاتك
ويجمع 4 الاف جندى
ويقرر يهجم على الأعداء ليلا عشان يربكهم
 ويا ريته ما عمل
لأن الجند لسوء الحظ
او يمكن مقصودة الله اعلم
ما اكيد فيه مندسين و
خرفان بالهبل انضموا للجيش يعنى

 مين يعرف ؟!! 
المهم الجيش تاه عن السكة
وعقبال ما الخليجى غير الأتجاه ورجع تانى
 كان جيش بن فاتك صحى واستعدلهم
ودارت المعركة بين الطرفين
وكما تقول الروايات الخليجى استأسد ع الآخر
وصمد طويلا .. لولا الخيانة
وفجأة جزء من الجنود انسلخوا عنه
وانضموا لجيش بن فاتك
ولأ كدا الخيانة باينة واضحة جلية تسد عين الشمس بقى !!!!
الخليجى وقف يدافع هوه ورجالته
 لكن الهزيمة لاحت
 حتى أبصرها الكفيف ف ليلة قمر أربعتاشر ف تمامه
 راح الجدع لامم أذيال الهزيمة
 وهربان ....
وقرر يرجع على مسقط رأسه ف الفسطاط
عشان يستعد من تانى ويلم أنصاره
 ويرجع يحارب الجيش العباسي
 والاخبار دى وصلت للمكتفى ف بغداد رقع زغروطة
وقرر يضرب ع الحديد وهوه سخن
 وييجى مصر ويبعت الجيش التانى بتاع .. دميانة
 لولا وصله مكتوب من ابن فاتك
 بيقوله خليك عندك احنا خلاص كدا !!
خلاص كدا ايه ؟
 ابن فاتك وصله اخبار ان الخليجى هنا ف الفسطاط
ومستخبى عند واحد معرفة
والواحد دا هوه اللى بلغ بنفسه المعلومة دى
 وقبض تمنها
بس ... زى ما بيقول مصطفى ابراهيم :
تلت الرصاص للعدو 
و تلتينه للخاين
ومعاك ألف حق يا فتى والله
يجرى بسرعة رجالة ابن فاتك
ويقبضوا على الخليجى وعلى انصاره
والمقربين اللى نجوا من المعركة الاخيرة
وكانوا حوالى 20 نفر وسفروهم بغداد للخليفة
و ف رمضان 293 كان محمد الخليجى داخل بغداد
على جمل متقيد ومتبهدل هوه واللى معاه
ولفوا بيهم عاصمة الخلافة
وجرسوهم وبعدين وصل الموكب للقصر
ودخلوا بالخليجى ... على الخليفة العباسى
اللى بعتر كرامته طبعا
 وقعد يشتم ف الدولة الطولونية واللى جابوها
 وف الآخر امر بقتله ...
وتغرى بردى بيقول عن مصير الخليجى
 "ثم قتله شرّ قتلة "
 بس مقلش ازاى واتعمل فيه ايه
 لكن كفاية نتخيل كم الغيظ اللى عند الخليفة
 واحنا نتصور يعنى
وبس كدا ... انتهت حكاية واحد من الثوار
 واسمه محمد الخليجى ابن الفسطاط
 ومصر الولادة اللى دايما فيها رجالة جدعان
 ف كل وقت 
وزمان
ومعنديش ملاحظات كتير بصراحة
غير ملحوظة اولى واخيرة استوقفتنى كل ما أقرى
 ف تفاصيل عن الراجل دا
اللى فجأة ظهر ولم الناس حواليه كدا ..
المصريين ف نهاية الدولة الطولونية
 كانوا بيعانوا من الظلم وافترا عيال خمارويه
اللى كان واضح انهم هيودوا البلد ف داهية
 وطمعوا العباسيين فينا
وبعد دخول العباسيين بالقوة الغاشمة
بعد ما كانوا قوة ناعمة من بعيد
الا ان بعد المعمعة ...
 ظهرت معادن الرجال
والشعب 
وفجأة انتفض الخليجى
ولما انتفض الناس صدقته
لأنها شافته بيحارب بجد .. مش تهريج
 بيعارض بقوة 
مش بالتصريحات للفضائيات
وقصاد الكاميرات
 وف اجتماعات ف البيوتات
الراجل استرجل 
وعمل الحاجة اللى تنفع مع خصومه
 وهى المقاومة بالسلاح والقوة
لأنه كان يعلم ان أى شىء تانى هيبقى تضييع وقت
واستنزاف ف جهد
والجدع كان ماشى زى الفل والله
وبصوا على خط سيره هتلاقوه عمل اللى عليه واكتر
ولما الناس شافته مخلص للقضية والثورة
 ساندته وانضمتله شوية بشوية
لولا الخيانة اللى خنجرها بيغرز ف ثانية
ومحدش بيلحقه
والخليجى لما مقدروش عليه بالقوة
 استخدموا الخسة وانغدر بيه زى طومان باى (شبيهه) كدا
وطومان باى برضو تقريبا مر بنفس التجربة
وقت ما سليم الأول دخل مصر
وطومان حاربه وكر وفر كذا مرة
لحد ما خدوه غدر برضو وبنفس الوضاعة
والحكاية شدتنى احكيها لسببين
اولهم ان هذا الرجل محدش بيعرفه مع انه يستاهل
و ندعو الله ان واحد زيه يظهرلنا ف الايام الغامقة دى
 ويلمنا بقى
بس بشرط .. اننا
 ودا السبب التانى لأى أحكى
 أننا نتعلم م الدرس
ومنغلطش نفس الغلطة بتاعته هوه وغيره
ومنديش ضهرنا لخونة واوغاد وبياعين شرف
عشان الطعنات القاتلة دى ... كفاية
واننا نحارب الخصوم .. بسلاح ينفع ينهزموا بيه
 وانا مضيت استمارة #تمرد صحيح
 بس الأستمارة مش كفاية
ولا هيا الطريقة للخلاص من كل الكلاب دول
والادب والذوق والمقاومة السلمية
مش هتنفع مع الأخوان
لأن اللى بيرفع عليك المسدس او المطواة
مينفعش تقف وقتها وتسكتله وتقعد تهتف !!!
ولكم فى محمد الخليجى أسوة حسنة
الراجل استقتل وشال السلاح وقاوم كما يجاب ان يحدث
 وفضل يزحزح ف خصومه
لحد ما لبسهم الُطرح فعلياااا
وكاد يسترد مصر من بين ايديهم 
 لولا الخيانة
لذلك اقول لكم احذروا من اللى عاملين
نفسهم نشطاء وبيتعاملوا مع منظمات عالمية تهدف لخراب مصر وتوتة توتة ..
خلصت الحدوتة 
وتصبحوا على ألف خير
المفارقة انه في كل هذه القصص لم يمت اي واحد
ممن وصلوا للسلطة ميتة طبيعية
القاسم المشترك هو هذه العبارة تم قتله شر قتلة
طيب عندك فكرة عن دور الشعب كان بيعمل ايه؟

خمارويه
 اسمة
Khumarawayh ibn Ahmad ibn Tulun
والسؤال
لماذا لقبت أسماء بنت خمارويه بقطر الندى
إنها أسماء – و هذا هو اسمها الحقيقى – بنت خمارويه 

 https://blogger.googleusercontent.com/img/b/R29vZ2xl/AVvXsEhI8z0RpBDuMrqs3bTNEZHkRPK9NT4JxwgszStd7BBFjKXQmmlRfeIPn6EIv0MpKMgO8BqsNtbwgbE-azdteTalLiLpJaF4Kx5rZehEcA3Be6DCosjH9acgs7qNmKXloAh_HieagmBzFAo/s1600/255727_412657255508575_1810585968_n.jpg
(تولى بعد وفاة أبيه سنة 271 هـ ) بن أحمد بن طولون مؤسس الدولة الطولونية فى مصر (254- 292 هـ ) و بانى مدينة القطائع ليتخذ منها عاصمة لمصر بديلة عن الفسطاط التى بناها عمرو بن العاص . و كان خمارويه واحدا من أربع و ثلاثين من الإخوة !!و كانت الدولة المصرية تمتد من برقة غربا حتى الفرات شرقا شاملة فى ذلك الشام , لكنها مع ذلك كانت منضوية روحيا تحت لواء الدولة العباسية فى بغداد , لكن الدولة الطولونية كانت تخوض ضد جنود الدولة العباسية المعارك من أجل الحفاظ على استقلالها ..حتى تولى خمارويه الحكم فأراد أن يقيم بين دولته و الدولة العباسية حالة من السلام . فأرسل إلى الخليفة العباسى المعتضد الهدايا و الرسائل التى انتهت بخطبة ابنته قطر الندى إلى الخليفة ذاته بعد أن كان خمارويه قد عرض زواجها لابن الخليفة !!
و كانت أسماء - قطر الندى – أجمل نساء عصرها و أوفرهن ذكاء و تثقيفا , و قد ولدت فى قصر القطائع – الذى أنشأه خمارويه على غرار قصور ألف ليلة و ليلة : إيوان ذهبى , بركة كبيرة من الزئبق , مسارح للطير و الأسود .....!!!! , و كان عمرها عند الزفاف أربعة عشرعاما .
دفع الخليفة مهرها ألف ألف درهم و كان هذا الصداق ضربا من الخيال فى ذلك العهد , لكن أباها أنفق على جهازها أضعاف أضعاف هذا المبلغ :
أريكة من الذهب عليها قبة من الذهب المشبك فى كل عين من التشبيك قرط معلق فيه حبة من الجوهر لا يقدر بمال .. و مائة هون من الذهب .. لقد صرف على جهازها أربعمائة ألف ألف درهم و هذا مبلغ هائل الضخامة يعادل ميزانية دولة فى ذلك العصر !!
ثم أمر خمارويه أن يبنى لابنته عند كل محطة استراحة قصرا منيفا تستريح فيه كأنها فى بيت أبيها .
و بدأت الرحلة و خرجت قطر الندى فى نهاية عام 281 هـ من مدينة مصر(العاصمة ) فى موكب عظيم يصحبها عمها شيبان و عمتها العباسة و الخدم و الحشم .. و مما يذكر أن القصر الذى بنى للاستراحة على الحدود الشرقية (لمحافظة الشرقية ) قد سمى قصر العباسة , ثم نشأت قرية سميت بنفس الاسم نسبة إلى عمتها .
و وصل ركب الأميرة إلى بغداد فى المحرم سنة 282 هـ و زفت إلى الخليفة فى احتفالات هائلة , و حظيت لدى الخليفة بكل الحب و الرعاية .وقد اتفق لها مع زوجها الخليفة المعتضد حكايات يجب أن تؤرّخ: ‏ ‏ وضع رأسه يوماً في حجرها فنام حتى غطّ في نومه. فتلطّفت في ميل رأسه من حجرها، ووضعته على مخدة، وقامت. وانتبه المعتضد من نومه فوجد رأسه على مخدة ولم يجد قطر الندى معه. فاشتد غيظه واستدعاها وقال لها: ‏ ‏ ما هذا الذي صنعت؟ أضع رأسي في حجرك فتتركيني؟‏ ‏ فقالت: إن فيما أوصاني به أبي ألا أجلس بين النيام، ولا أنام بين الجلوس فأعجب ذلك المعتضد وقال: ‏ ‏ نِعم ما أوصاك به أبوك.‏ ‏ وصارت الأمثال في قصر الخليفة تُضرب بأدب قطر الندى. ‏ وناولها المعتضد يوما قدح خمر لتشربه، فقالت: ‏ ‏ يا أمير المؤمنين، ما شربتُه قط، والنبي صلى الله عليه وسلم يقول عن النساء: ناقصات عقل ودين، والرجال إن شربوا الخمر ففي عقولهم وأديانهم ما يحتمل حيفها، والنساء بضدّ ذلك.‏ ‏ فاشتد ولعه بما سمع منها وأعفاها. ‏ ولما قُتل أبوها خمارويه، اتصل خبرُ ذبحه بالمعتضد قبل أن يتصل بقطر الندى. واتفق أن دخل المعتضد على قطر الندى في أثر ذلك، فأحست فتوراً منه في معاملته إياها. فقالت:‏ ‏ أحسن الله عزاءك يا أمير المؤمنين في خمارويه، وجعل من غلمانك خير خلف منه. ‏ ‏ فقال لها: أبلغك قتلُه؟ ‏ ‏ قالت: لا والله. ما يدخل إليّ خبر من غير جهتك. ‏ ‏ قال: فمن أين عرفت ذلك؟ ‏ ‏ قالت: يعفيني أمير المؤمنين من هذا.‏ ‏ قال: لا بد من ذكر ذلك. ‏ ‏ قالت: كان أمير المؤمنين طول حياة أبي يُبدي لي برّاً وتلطفاً، فأعلم باتصال ذلك رعية لمكان أبي. فلما رأيتك اليوم قد عاملتني بفتور ولم أعلم لي ذنباً أستوجب به ذلك، خطر بخاطري أن أبي مات. ‏ ‏ فاستحيا المعتضد واعتذر. ثم قال لها: ‏ ‏ فما بالك لا يظهر عليك أثر الحزن عليه؟ ‏ ‏ قالت: فرحي بك يغلب على حزني عليه، والرضا بحياتك يقهر السخط بموته. ‏ ‏ فقبّل رأسها وحلف لها أنه يرعاها في موت أبيها أكثر من رعيه لها في حياته. ‏
, ثم ماتت الأميرة الجميلة قطر الندى فى رجب سنة 287 هـ و دفنت فى قصر الرصافة ببغداد , ثم مات الخليفة زوجها بعدها بعامين ... ثم :
زالت الدولة الطولونية نفسها عام 292 هـ - 905 م

ليست هناك تعليقات: